自1974年起每年12月大家喺電視上都會見到《歡樂滿東華》，今年都唔例外，喺12月2號晚舉行嘅《歡樂滿東華2017》更打破紀錄籌得接近一億二千萬嘅善款。

不過當晚嘅演出陣容就大不如前，以前有肥姐踩雞蛋、吳剛飲油、張栢芝飛車等經典表演環節，如今就只得「星夢幫」鄭俊弘、「星夢幫」胡鴻釣同「星夢幫」何雁詩輪流獻唱，仲有懷舊金曲嘅薛家燕同黎小田合唱，但就好似同平時嘅歌唱節目差唔多。

今日就有雜誌報導指今年《東華》連司儀都差啲唔夠數，阿姐汪明荃要撐足7小時。曾為藝人，現任職東華三院第一副主席王賢誌接受《蘋果》電話訪問時，表示早前開會已向無綫高層杜之克要求明年《東華》與台慶個期唔好太接近，而下一次開會會再向高層反映卡士問題。

問係咪覺得卡士太弱？王賢誌話﹕「無可否認今年比往年少咗好多一線小生花旦同歌手支持，可能大勢所趨，出面好多job同機會，我出年先係主席，都會早啲安排搵定下一屆嘅嘉賓，如果有一半嚟到都好滿足，希望做得更好。」