【失戀旅行團×蘋果】打泰拳等於俾狗公X? 拍拖7年新娘竟然不是我!
前度失戀旅行團分手離婚結婚
全港首個失戀旅行團早前一出公開招募,就引嚟迴響,雖然唔少網民都回應「首先要有...」,但仍不乏參加者。
失戀旅行團(BreakUp Tour)由Secret Tour聯同沈旭暉創辦嘅GLOs舉辦,8月底已經截止報名,大會要求參加者要寫「給前度最後一封信」分享戀愛經歷,目前已經收到650封,正逐一見面了解,精挑細選,將會選出四位參加者齊齊喺9月尾去東京。
《蘋果動新聞》直擊咗面試情況,參加者Cherry主動向丈夫提出離婚,佢話為咗小朋友,一路以為只要「退一步」,就可以維繫婚姻,點知丈夫成日以為佢去偷食,只係報個泰拳同瑜伽班,就換嚟丈夫連珠爆發,「你明知嗰啲地方,係俾啲狗公X女嘅地方嚟㗎啦!你仲要衝過去,你唔好扮天真,扮純情啦!」令Cherry心死。
男參加者Jackson嘅經歷係戀上富家女,享受過美好時光,可惜人總要面對現實,唔通愛情同麵包,始終都係麵包重要啲?
仲有位參加者Halcyon講唔夠兩句已經聲淚俱下,話拍拖七年,突然睇到男友嘅結婚相,「新娘竟然不是我」,究竟發生咩事?睇片就知喇!
失戀旅行團團隊成員Isa話,要喺650封信中選出4位真係好難,而最主要嘅評審條件,就係要睇到參加者有心move on,可以透過旅行或多或少放低傷痛,有重新出發嘅盼望。
失戀旅行團將會選出4位失戀慘慘豬,喺9月尾去東京散心,聽日就會有專人聯絡。《蘋果動新聞》亦將會齊齊飛去東京採訪,陪參加者齊玩、齊笑、齊喊,密切留意!
主辦單位:Secret Tour X GLOs(BreakUp Tour)
活動詳情: https://www.facebook.com/breakuptour/
失戀旅行團團隊收到約650位參加者嘅「給前度最後一封信」。
參加者Jackson同前度嘅背景相差太遠導致分手。
參加者Halcyon拍拖七年,突然發現男友結婚,但新娘不是自己。
失戀旅行團會選出4位參加者去東京散心,如果選中嘅,聽日會有專人通知。