聲言做到最後一分一秒嘅煲呔，噚日爭取連任，唔係為自己，係幫世衞總幹事陳馮富珍。雞珍06年當選總幹事，任期明年6月屆滿，佢唔使好似煲呔咁落任，噚日飛到北京喺紫光閣同總理溫家寶、衞生部部長陳竺見面，溫總讚雞珍提升世衞管理水準同領導能力，又成功應付豬流感，仲開口撐雞珍競選連任。
煲呔噚日亦透過新聞稿，話歡迎並全力支持雞珍競逐連任，指雞珍出身香港，獲提名競逐連任令人引以自豪。雞珍喺日內瓦工作成績有目共睹，不過唔係毫無瑕疵一面倒獲好評，有專家認為佢誇大咗幾年前流感大流行同前年豬流感全球爆發危機，變相令藥廠疫苗大賣，發咗筆「瘟疫財」呢！