筆者在投資課第一堂經常問學員以前點買股票，有些話會跟消息，有些睇報紙推介，亦有少數人會落手落腳做分析，有時筆者就跟同學玩遊戲，找來一堆昔日的好消息，問學員當日會唔會買？結果大部份同學見好消息就買，其後乏善可陳者，十中有七，好消息後追入其實陷阱重重，用表面分析又落得慘淡收場。
平日股民可能最留意中國人壽（2628）、港交所（388）等，忽略了一些無甚新聞的股隻，到突然出好消息，例如公司發盈喜、策略投資者入股等，股價隨消息飆高，跟風者才驚覺走漏了眼，再加上各方推介，不少投資者會在此時追入，結果「不幸地」一入即跌。

我對消息股研制了一套應對方法，但到處宣揚方法未必靈光，對廣大讀者亦無用，不如講講箇中原理以供參詳。其實大戶消息比散戶靈通得多，如果真係咁秘密，股價就不會無端上升，所以，當市場突然傳出好消息，投資者應該先冷靜十秒，問自己好消息在市場上是否已廣泛流傳？價格有否全面反映，估計好消息可以刺激股價升幾多，若消息落空，或市場唔受落，估計會跌幾多，再計成事機會及值博率，如果結果正面，不妨候機買入，因為十隻好消息股，有七隻會先行回吐，見回吐後做出支持，拒絕下跌才買入，總比當天盲目去追理性一點。
相較之下，筆者更喜歡利用壞消息入市，皆因壞消息股跌到殘，一旦確認唔再跌，隨時撈中個底，前一陣子筆者看好因炒輸accumulator而暴跌的中信泰富（267），正是這個原因，士佳在其大跌後，回升到6元之時買入，12元之時賣出大部份，其後斷斷續續亦有買進。唔，看官閱讀至此，心中肯定盤算，近日有啥壞消息股？筆者愛股福山能源（639）近日配股，但股價不見受壓，昨日更創新高，相信仍可看高一線，然人有人格，股有股格，此股慣常牛皮一輪，才飆升兩天，大家不妨在其牛皮時做點功課，將其納入觀察名單之中。
近日大市波動，多少要講吓市況，昨天筆者叫寓攻於守，大家應感受到我並非睇直線上升，真係收唔高於20893，大市仍係反覆居多。
張士佳　華富嘉洛證券投資服務部董事