【銅鑼灣】近年精神狀態欠佳嘅藍潔瑛，自從經朋友介紹有咗信仰之後，情況已明顯有好轉，咁有嘢寄託個人自然有目標有方向，絕對係好事。噚日傍晚5點左右，着住灰色風褸同黑長褲嘅藍潔瑛，單拖喺銅鑼灣時代廣場出現，見佢身邊冇朋友陪，一個人漫無目的咁四圍行四圍望，睇佢似係嚟行街打發時間。

人有三急

不過行行吓藍潔瑛人有三急，問途人洗手間喺邊，去咗幾分鐘之後就出返嚟商場繼續行，以前靚絕五台山嘅藍潔瑛突然有興致行咗去Estee Lauder嘅化妝櫃位度睇化妝品，見佢仲主動問啲售貨員，雖然啲售貨員都認到藍潔瑛，不過都當佢係普通顧客咁招呼。見藍潔瑛左睇右睇，睇足成5、6分鐘，但最後都冇嘢睇得啱空手離開。
買唔到嘢嘅藍潔瑛走咗出去廣場外煲煙，見佢一邊食一邊擔天望地，甚至坐喺石壆休息，其間有啲市民又認到望吓佢，不過藍潔瑛都冇理啲人嘅目光，繼續食煙，不過明顯佢睇起嚟健康咗。食完後藍潔瑛就行去附近嘅小巴站坐車離開，冇再留喺銅鑼灣同人逼。
採訪、攝影：楊浩賢