中大醫學院內科及藥物治療學系沈祖堯教授再獲殊榮，佢帶領做嘅「腸胃潰瘍出血創新的非外科治療法」研究，近日獲頒「2007年度國家科學技術進步獎」二等獎，沈教授噚日接受香港電台訪問時話，初時用內窺鏡做呢種微創手術要放下好多包袱，因為要一個外科醫生放低手術刀唔開刀，改用內窺鏡醫病人，好似要佢放低尊嚴，甚至顛覆畢生所學。

收入有限冇乜好爭

港大教授睇私症賬目問題備受質疑，沈教授話自己每星期只花兩個上晝睇私症，實收三分一診金，而且呢啲收入規定只可用番喺公事上，唔可以亂使。佢謙稱中大喺新界，缺乏名牌效應，冇乜大富豪搵中大教授睇病，因此收入有限，賬目亦冇咁多爭拗，唔會爆出《白色巨塔》式醜聞，「大家都好窮，冇乜好爭。」
除咗教學同研究工作，沈教授新一年亦會兼任逸夫書院院長，佢話現代父母太錫仔女，所以大學生都唔係幾成熟，「好難接受別人批評」，希望大學除咗教佢哋知識，亦教曉佢哋如何做人，唔好因為少少挫折就要生要死。
工作繁重嘅沈教授平日爭取時間運動，每日最少由地牢行樓梯上自己九樓辦公室一次，行足10層樓，呢種健身方法，值得參考。