立法會議員湯家驊淚別公民黨後，其實仲有好多手尾跟。例如佢啲助理10月1日後係咪冇嘢撈？作為好老細，梗係應該幫下屬諗埋有乜好路數。花生友聽聞，湯狀嘅3個立法會議員辦事處，會喺10月1日前全部關閉，10幾名員工遣散。但由於湯狀搞緊智庫「民主思路」，唔知可唔可以安排部份員工過檔智庫幫手？
花生友噚日朝早喺立法會，仲見到湯狀同前黨友「袋巾」梁家傑喺走咗入立法會前廳密斟，唔通袋巾想勸湯狀回心轉意？花生友睇嚟諗多咗，湯狀話主要係商討處理夾錢聘請公民黨研究員一事，因為佢已經退黨，日後唔會再夾，而民主思路亦想約公民黨執委坐低，討論後政改問題，佢引述袋巾對呢兩點都即時答應咗。

幫智庫搵金主

除咗同公民黨搞清上述問題，據知湯狀亦正忙於為民主思路搵緊辦事處落腳點，近日已睇咗個位於鰂魚涌、有裝修、近900呎嘅單位，但月租要成3萬元，由於民主思路尚未籌款，加上唔少成員都對「揼心口」出錢有保留，所以湯狀已經同商界人士接觸，希望可以為個智庫「撲水」。
湯狀透露，前日接觸商界成員都對捐款反應正面，但話要視乎金額大小，當中主要係傳媒唔熟悉嘅商界人物。湯狀預計，民主思路一年最少要200萬營運，因為除咗租金，都要請3、4名員工，加上要進行研究項目，相信有關數額走唔甩，但佢講明民主思路唔會喺今年7.1遊行籌款，自己今年7.1亦預料離港唞唞「療傷」。

花生友