馬勒當拿雖然冇碧咸咁靚仔，但搵錢能力一樣咁強；佢正話先至出院，就立即搵錢，將自己同死神搏鬥嘅經過賣畀一間電視台。
家陣四十三歲嘅馬勒當拿，早排因為心臟有事，喺醫院深切治療病房住咗成十二日；最後佢都冇事，重喺上個禮拜出院㖭。所謂「大難不死、必有後福」，佢一早出院就俾阿根廷一間電視台出八萬美金（約六十二萬港紙）加兩隻靚表同一架高爾夫球車，請佢接受獨家訪問，講吓佢處於生死邊緣有乜感受，而個節目重喺上星期五出咗街。
馬勒當拿佢病一病就執幾十萬，睇嚟又唔衰得晒；既然幸運女神肯企喺佢身邊，佢就應該好好珍惜，所以我求大俠認為佢𠵱家要做嘅，唔係搵錢，而係減肥同埋咪再掂嗰味嘢。

不滿士砵亭減薪祖奧賓度掘金去也
繼荷蘭迪保亞兄弟後，葡萄牙前鋒祖奧賓度亦可能今夏去卡塔爾踢波。祖奧賓度季尾就同士砵亭約滿，但因佢唔滿意會方要佢減薪五巴仙，應該唔續約，轉去卡塔爾掘金。我求大俠就收到風，卡塔爾嘅艾阿拉比向佢提供一份總值五百萬美金（約三千九百萬港紙）嘅三年合約，條件好成咁，邊個唔心動！