Eason喺最後一場《EASON'sLIFE陳奕迅2013演唱會》，唱慢歌《陀飛輪》有歌迷突然大叫：「Eason！」又有歌迷無厘頭大叫：「Joey！」令到台上嘅Eason唔耐煩咁做出一個倒轉姆指嘅手勢，以表不滿；到同歌迷握手，Eason又攞咗一名女歌迷嘅手機，作狀要擲到地上。之後話：「大家幾時唔用眼睛，只對Mon(手機螢幕)，頭先我真係有啲躁，點解你哋淨係掛住影相，完全唔尊重，完全唔集中...」

報道一出，自然成為網民熱烈討論嘅話題，有人話Eason得罪歌迷嗌回水，有人就覺得香港人都要檢討下...

撐Eason嘅網民係咁講嘅：


「我覺得佢講得好有道理」

「香港啲觀眾不嬲都保守0架啦，拎住啲螢光棒『fingfing』吓就覺得好投入...」

「如果話客人永遠是對的，咁大陸人拎錢來港消費，你哋又話人行為劣質？睇唔過眼你又識出聲？到你哋行為劣質，Eason出聲就話人寸？都幾雙重標準囉。」

「唔係歌手水平問題，係觀眾水平問題，以為俾幾百蚊買飛，當咗自己老闆。」

「文化唔同咗啦.....個個搏命鬥快影相，唉...」

「好多人入場都唔係欣賞演出者表演，享受過程同氣氛，係掛住用電話拍片，係又拍唔係又拍，同埋用電話擋住影響人哋觀看囉。」

「若果係外國歌手，有啲係絕對唔俾影相，一影相就即刻停唱同返後台。」

「香港人有時同內地人一樣，以為使錢就大X晒」

「很多的回覆，也是以金錢利益來作比較，但沒有了生活的感覺。山頂位，山腳位，投入不投入，是自己的事吧，很難作比較。樂在其中或計算其中，大家自選吧。」