劉醒哥同大閘蟹賣廣告，大叫：返嚟呀~~，結果叫到連視帝都蟬聯埋；第一屆世界金球獎嘅候選人兼最後3強之一嘅恩尼斯達，唔知係咪咁所以有樣學樣，同隻大灰熊大賣廣告造勢。講真，白面同劉醒哥一樣都係有實力、等攞獎，唔怪得之有報道話英超富豪球會曼城打算以破世界紀錄嘅8,500萬鎊轉會費，羅致呢名巴塞隆拿中場啦！

拍住熊仔賣廣告

恩尼斯達呢個廣告，其實係sell要幫襯GolTV先有西甲精采嘅賽事睇，不過，廣告就好鬼馬，講白面練波時唔覺意整傷咗隻大灰熊，充滿愛心嘅佢於是帶隻熊療傷仲接埋佢返屋企住，而隻熊當然順理成章成為咗白面嘅粉絲；最正就係喺廣告末段，佢送本類似GolTV嘅menu畀大灰熊做聖誕禮物時，隻熊睇到係基斯坦奴朗拿度（C朗）做封面（其實係封底），即刻好唔老嚟，要白面話畀佢聽翻轉本menu，見到係白面做封面，隻熊先至happy番，擺明寸C朗唔夠自己受歡迎。
不過，又真係抵白面寸嘅，佢無論喺國家隊同埋巴塞隆拿嘅成績，絕對係喺明年1月初公佈嘅第一屆世界金球獎大熱，風頭完全壓倒同樣入最後3強嘅隊友美斯同埋沙維。由於佢咁勁，加上仲係26歲好當打，所以有報道指英超嘅曼城，準備以破世界紀錄嘅8,500萬鎊（約10.6億港元）羅致佢，如果真係成事，肯定成為一時佳話。
其實，聖誕臨近，球員都要出席好多活動，當中又以慈善活動居多，以配合聖誕要分享喜悅嘅意義，其中恩尼斯達嘅隊友碧基就扮Q版武士屠龍，替慈善機構拍月曆，而英超嘅車路士及愛華頓，就不約而同拉隊到英國兩間兒童醫院探望病童，仲向佢哋大派禮物，好鬼溫馨！