【新增內容】

【小三起底】年賺40萬唔夠求包養 朗尼做咗Sugar Daddy？
http://bit.ly/2evyPuv

---------------------------------

關於老公朗尼偷食一事，據講高蓮非常憤怒，親自打電話鬧爆個小三，仲考慮緊離婚，勢同呢位愛華頓球星瓜分佢身家，個數高達7,000萬鎊（約7億港元）。

朗尼上周涉嫌醉駕被捕，之後仲被踢爆原來佢趁大肚嘅高蓮唔喺度，就去飲酒識女仔，皆因佢醉駕架車，係屬於一個叫Laura Simpson嘅女人，而當時Laura亦喺架車上面。本來去咗西班牙度假嘅高蓮，事發後已經即帶埋三個仔返回英國，暫時搬番娘家居住，而被指小三嘅Laura就向英國《太陽報》透露，高蓮喺Instagram先聯絡佢，之後就打電話畀佢質問。

Laura咁講：「佢打嚟問我發生咩事，我就同佢講個事實，就係我同朗尼由夜店離開後，一齊去攞車，而我架車唔喺酒吧門外，所以要先搭車去我朋友屋企附近先攞到，但佢聽完後好似好嬲，但就好有禮貌咁叫我唔使向佢道歉。」

另外，《太陽報》仲話高蓮返到英國後即同朗尼大吵一鑊，話因為朗尼令到佢畀全世界笑，仲向佢咆哮話點解佢唔call uber就算，搞到醉駕令呢單醜聞爆咗出嚟。而據高蓮友人爆料，話佢已經諗住同朗尼離婚，對老公一而偷食，直情好似殺死咗佢一樣，令佢痛不欲生。如果13萬鎊周薪嘅朗尼真係同高蓮離婚，淨係贍養費都一定畀唔少，《太陽報》就話朗尼身家入面可能有7,000萬鎊，都會被高蓮挖走。