荷李活影星畢彼特（Brad Pitt）同老婆安琪蓮娜祖莉（Angelina Jolie）於上周二驚爆婚變，安琪蓮娜單方面以家庭健康理由向法庭申請離婚，要求獨攬六子女撫養權。

雖然畢彼特被指控醉酒及虐兒，不過外界仍然揣測畢安婚變嘅真正原因。曾於《Brangelina, the Untold Story》預言畢安婚變嘅傳記作者Ian Halperin在英國《每日郵報》撰文，寫下有關畢安鬧離婚嘅原因，情節似足小說，信唔信就等大家自行判斷。

傳記作者Ian寫到41歲嘅安琪蓮娜想帶埋仔女搬到英國居住，繼續發展佢嘅慈善及政治事業，更向畢彼特提出開放式婚姻，叫畢佬留低喺洛杉磯繼續拍戲，不過畢佬就唔肯，令安琪蓮娜好憤怒。傳記作者Ian亦寫到安琪蓮娜想喺英國上議院取一席位，準備隨時放棄美國公民身份，亦以已故戴安娜王妃（Princess Diana）嘅慈善事業成就為目標。文中提到有位朋友透露安琪蓮娜嘅野心係想嫁入英國皇室，而單身嘅安德魯王子（Prince Andrew）係佢目標之一。