噚日天氣麻麻,凍得嚟仲不時落雨,冇乜嘢做最好留番喺屋企休息。通常都會將星期日留畀屋企人嘅唐唐就認真唔話得,唔理天氣幾差,晏晝都專程去到深水埗麗閣邨,出席民建聯前主席曾鈺成議員辦事處搞嘅新春團拜,幫手點完睛又順便致埋辭,仲叫現場市民多多支持民建聯,祝民建聯風生水起兼順風順水,立法會選舉未開波就咁積極幫民建聯拉票,唔知佢出身嘅自由黨會唔會呷醋?
政制及內地事務局局長林瑞麟都有到場,佢嘅笠高帽行動仲誇張,一嚟到就叫阿曾做「鈺成」,令人毛管戙之餘更加忍唔住陰陰嘴笑。林D9大讚喺「鈺成」領導下,民建聯九西支部有咁嘅成績係非常成功,祝佢哋風調雨順,鞋油落得多過唐唐好多噃。