當年今日

蘋果助學金月尾截止申請

蘋果日報 2003/09/15 00:00


為咗鼓勵成績好但家境有困難嘅學生畀心機讀書,減輕佢哋屋企嘅經濟負擔,一年一度嘅蘋果助學金喺九月初已正式接受申請。蘋果助學金已經同唔少清貧學童共度六個寒暑,助學金嘅目的主要係減輕本港中、小學生喺學費、書簿同膳食嘅支出。

可向校方查詢
早排,大使已經向全港逾千間中、小學寄出宣傳單張同申請表格,有需要嘅同學可以向校方查詢。
𠵱家經濟環境差,好多貧困家庭都希望知多啲申請助學金嘅審批準則,呢排大使淨係接查詢電話都接到手軟,佢哋提出嘅疑問真係層出不窮。某日,家長甲問:乜嘢叫做成績好?點樣界定為貧窮,我哋擁有私人物業,可唔可以申請?隔日,老師乙又問:操行良好,即係代表乜嘢?
成績操行評核
大使喺度重申,申請學童嘅成績同埋操行都會係我哋評核嘅項目之一,由教育界人士組成嘅審批工作小組會制訂一套評分標準去考量,以求達到公平公正嘅原則。
以下大使歸納咗五個重點,係讀者成日打嚟問嘅,希望幫到大家了解多啲申請助學金嘅資料。
1.申請助學金截止日期為本月30日(周二)
2.申請人可自行影印助學金申請表格
3.填妥表格後,必須連同最近一個學期成績表或成績單副本,以及家庭收入證明文件一併寄回
4.報名表格寄交:將軍澳工業邨西駿盈街八號蘋果助學金辦事處,信封面註明「申請助學金」
5.綜援家庭不接受申請
其實,申請人只要花幾分鐘詳細睇吓申請表嘅內容,就可以搵到以上嘅答案,當然,若果你哋重係有唔明白嘅地方,大使一樣歡迎你哋打電話:29908688查詢。

暖流熱線
電話:29908688
傳真:23702192
電郵:[email protected]
網址: http://www.charity.atnext.com