羅范椒芬唐裝新Look - 李八方

蘋果日報 2002/02/19 00:00


教統局局長羅范椒芬一向嘅形象都好女強人,噚日同記者茶敍,着件鮮紅色唐裝衫加黑色短裙,真係令人耳目一新,佢話件衫價值幾百蚊,係聖誕節全家去佢家鄉上海玩時順便做嘅,係「真絲大王」貨色嚟㗎,一家四口每人一件。
繼舊年送福袋畀記者後,羅太今年又有新意,新年流流一人一書,書名叫《激勵人心的一句話》,希望大家洩氣時可以為自己打打氣。佢每本書都有簽名,重夾住張縛金色絲帶、寫住「資訊便是力量,知識就是財富」的書籤,令「輸輸」聲變成書中自有黃金屋,真係諗得周到!
羅太鍾意「人的潛能總是在被激發後才能發揮到極致」、「創意總在認真工作的時候,自然而然的湧現」等句。全部都係叫人努力、認真做嘢嘅!重有一句,係卓別林話最滿意嘅傑作係「下一個作品!」唔通羅太有咩暗示?
(圖)羅太着咗件鮮紅色唐裝衫,襯上黑色短裙,喜氣洋洋,形象令人耳目一新。


E-mail:[email protected]