2007年金融風暴，香港好多公司受創，惟有諗縮數請散工以節省員工福利開支，近年甚至把長工職位變成散工職位，時薪比長工高，但還是求才若渴。那邊廂，僱員難頂OT工作文化扼殺生活，心想既然一樣無前途上不了樓，索性炒散。話說自僱兼職數字由1997年的2.4%上升至2014年的6.8%，所以近年求職網與搵工apps湧現，漸漸改變了香港人的工作模式。

職到：即時通知最快個半小時搵到工
因為多人炒散，所以有「職到」這搵工app，用Uber即時通知制式，創辦人之一的黃貝芝（Xania）：「飲食業特別難請人，僱主有時臨急搵替更，有人最快試過個半鐘搵到工。」登入app後要填頗多資料，還有心理測驗幫你配對適合工種，僱員每填一項都有評分，每完成一次工作也會得到僱主評分，紀錄良好、上班準時沒甩底者評分越高，之後申請工作時排名越前。我這等見習炒散者豈不被累積了大量讚的炒散王壓到最底？原來現在連僱主都懶得特意約時間見工，拍條短片自我推介是必殺技，「九成僱主都先睇呢類申請。」短片最基本條件是穿乾淨整齊衣服，還要留意背景亮度，Xania：「有人用幾國語言自我介紹，一口氣講到自己識乜，咁就好易搵到工，同埋唔好等夜晚成個人攰晒先拍片，僱主睇得出嘅。」另外，僱主們也愛在散工裏物色表現良好的員工轉為長工，好過見工在一個小時傾談內要決定聘請誰。此app好處是連僱主都有評分，聽說有僱主專聘請沒買保險沒簽約的part-time做危險工作，或把最辛苦工作留給part-time員工，Xania：「僱主要請人做嘢都難啦，如果份工辛苦無理，佢哋都驚下次請唔到人。」

炒散王：小調節工作要求　更快填補空缺
另一搵工app「炒散王」創辦人黃家俊17歲起已是炒散王，當時搵散工沒門路好困難，多靠朋友介紹。當年由低做起，洗廚房辛苦但人工高，他說：「人哋點我洗，我咪洗囉。」現在散工需求越來越大，散工時薪已經追過長工時薪，好多人認真計算過，連同雙糧和假期均除，兩者時薪差無幾，故寧願做散工換來自由工時。不過有很多時候，有工都無人願意做，「好多僱主都唔太清楚自己想請啲乜。」其實有時只要在工作要求上作點小調節，會更容易請到合適的人。「如果請人嘅地點有好多家庭主婦，咁僱主可以調一調工時，例如中午12點至下午4點一更，等啲媽媽可以帶孩子放學或者返屋企煮飯，去到5點起另一更，咁會更快填補空缺。」

為乜炒散？
1.體驗行先畢業生
年齡多為18至25歲，Xania：「佢哋剛剛畢業未決定做啲乜，搵外快做住先，或者儲錢去workingholiday。體驗唔同工種，找興趣方向。仲有班人喺外國返番嚟，搵到正職前都會做part-time頂住先。」
2.日踩兩組等錢使】
這類人炒散全為錢，他們生活艱難，正職以外要搵外快維持生計，Xania：「我哋有啲工種係晚上九點至凌晨四五點開工嘅，例如通宵做setup工作，好受歡迎，因為人工較高，每小時有大約$70，每晚做五、六個鐘，三、四點放工。」
3.人生轉捩點
就是人生遇到大改變的一類人，例如有些人由秘書變成全職媽媽，為照顧孩子分身不暇，但希望搵外快幫補家計。
4.提早退休不想脫節
Xania：「唔想同社會脫節，多試試自己嘅可能性，同時搵啲外快。」
5.沒落行業焗轉型
Xania：「做開製衣呀、生產呀，依家工業沒落，佢哋被迫轉行，佢哋見到唔同工種機會，但唔一定會想再做全職。」

記者：陳慧敏