要Keep住身體健康，真係唔可以懶㗎，好似77歲嘅吳耀漢，日前就俾《蘋果》讀者見到佢一個人去健身，但其實圈中都有好多同吳耀漢咁上下年紀嘅男藝人，都操到爆肌嘅身形。

謝賢(80歲)
最近收咗阿仔霆鋒8500萬豪宅父親節禮物嘅四哥( 新聞連結： http://bit.ly/2rQcDUM )，四哥當然開心啦！已經80歲嘅四哥，見佢都仲好老而彌堅㗎，之前佢同修哥(胡楓)、Joe Junior同曾江一齊去俄羅斯拍《四個小生去旅行》㖭！四哥o依家都不時着住背心，晒吓手臂，真係手瓜起腱㗎！

李家鼎(71歲)
李家鼎你睇到佢主持節目中氣十足，事關當年佢一樣係fit到漏油冇得輸。以前佢教人騎馬，體能當然有番咁上下

陳惠敏(70歲)
當年有句說話好流行，腳就係李小龍，拳就係陳惠敏啦，講到最威水就係83年參加「世界精英搏擊大賽」，用咗45秒就K.O.左日本對手森崎豪。事隔咁多年，o依家惠敏哥行出來仲係好有台型，有姿勢有實際。

羅莽(64歲)
羅莽當年係邵氏武打演員，真係fit到爆，身上嗰六舊腹肌同胸肌都唔係講笑，正所謂食過夜粥唔同啲，所以o依家淨係食老本，都仲夠照。