來自公仔箱嘅「高手」，有機會出嚟拍電影，但一啲都唔珍惜，對幕後人員一啲禮貌都冇，到知道人哋唔係低級職員後先識驚，可惜已太遲。據知呢位2014年先讀藝訓班入行嘅高手，家底唔錯，又或者因為有啲後台嘅關係，好快就有機會拍處境長劇，畀足機會佢發圍，可惜佢到𠵱家都彈唔起。朋友爆料話：「佢成30歲人先讀藝訓班，屋企環境唔差，平時揸靚車開工，學歷亦都唔錯，去過美國讀書，喺香港都讀名牌大學，但基本禮貌都冇。」

呢位高手早排有機會拍江湖片，雖然唔係重要角色，但電影組都派人同佢夾通告時間，希望大家協調好啲，點知佢就只係WhatsApp張公仔箱通告畀人，話只係得某一日可以，仲話自己下午就要走，趕返去拍劇化妝。當時幕後同事就問佢即係幾多點要走，點知呢位唔記得咗自己只係七線奀星嘅高手，忽然巨星上身，態度好差咁話：「其實張紙有寫時間嘅，咪寫咗喺度囉！」幕後人員畀佢激到紮紮跳，加上佢個「朵」原來一直都唔好，監製知道後就決定飛起佢，反正少佢一個唔少，但最後高手搵中間人擺平件事，雖然戲仍然有得拍，但去到片場就冇人理佢。

撰文：Jessie

姐匙Talk

我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。