24歲美國小天后Ariana Grande今年5月在英國曼徹斯特舉行個唱時發生炸彈恐襲，其巡唱一度叫停，佢重踏舞台後已移師到亞洲巡迴開騷，完成中國同台灣各站後，今日唱到香港亞博館。

受恐襲影響，香港Live Nation及亞博館加強保安，警方消息稱，現場有80警，只在外圍佈防巡視，當中包括機動部隊及反恐特勤隊。

觀眾從下午開始已經陸續入場，有歌迷戴住Ariana招牌兔耳撐偶像，而觀眾都要通過金屬檢測器作安檢，入場人士勿攜帶長雨傘、攝錄設備、橫額等，連背囊、手提袋都唔例外，只可帶尺寸唔超過A4小型透明膠袋入場，現場觀眾都要將物品放入膠袋寄存，再過安檢然後入場。同時，安檢亦安排爆炸品搜查犬在場檢查觀眾有否攜帶爆炸品，而今次演唱會堪稱史上最嚴謹。

今晚嚟睇騷嘅就有陳瀅，佢表示：「我特登嚟睇，其實不嬲都好鍾意Ariana Grande，知道香港站係佢最後一個站，所以更加要嚟睇！」至於Ariana Grande 5月在英國曼徹斯特舉行個唱時發生恐襲，問到佢會唔會擔心？佢話：「唔擔心，香港治安非常之好，而且香港保安部門亦做得足夠所以唔覺得擔心。」而屋企人會唔會叫佢唔好嚟睇？陳瀅：「唔會呀，演唱會始終係enjoy。」要提早嚟到安檢會唔會覺得麻煩？佢話：「唔會，我覺得係要有嘅，保障市民安全，令入場嘅朋友安心去玩。」