前亞姐筱靖疑墮拍檔騙局 餐廳欠百萬街數
筱靖德國餐廳
【新增回應】
前亞姐筱靖上年1月投資七位數字,同朋友合資喺銅鑼灣開德國餐廳(新聞連結: http://bit.ly/2rpyD9i ),一直好信任拍檔,自己好少落手打理,點知今日有周刊爆筱靖疑被騙,上月去完加拿大旅行返港,發現餐廳嘅現金冇晒,間店又欠成百萬街數,原來係拍檔一直拖數冇俾。
據周刊指筱靖呢一年先後俾4次錢嚟填數,每次講生意唔好,拍檔今年初又叫筱靖再俾錢,聲稱如果唔俾,供應商就唔會再俾貨,筱靖仲有啲其他生意,一時之間拎唔到咁多現金出嚟,筱靖返屋企問,阿爺就拎咗一大堆錢俾筱靖,之後話員工冇糧出,筱靖又再俾50萬出糧。
報道又指筱靖後嚟先知拍檔拖咗員工三個月糧,又冇俾租同牌費,啲單都係拖數,筱靖睇番公司盤數係一直有賺錢,計埋股本,起碼有成千萬,更有員工指筱靖嘅拍檔好少返去,只係見筱靖現身嗰日,佢哋先會落舖,又唔知拍檔有冇拎餐廳名去借貸,目前交俾律師處理。
《蘋果》向筱靖問及欠百萬街數一事,佢就話:「交咗俾律師去處理,會清佢哋盤先,咁佢哋都走咗,搵適當嘅人去處理番件事,因為當時我加拿大返嚟,我返去之前我都問過有咩問題,當時得租未交整,我都係俾咗錢佢哋,我返嚟嗰時,原來租係成5個月冇交,員工三個月冇出糧,o依家基本上處理咗我舊公司全數退股。員工糧我出晒,我唔會因為我信錯人,要員工承受,基本上係欠供應商嘅錢,或者佢哋用我嘅關係、我屋企嘅關係,攞咗一啲著數,係由上年開張,一路冇交過數,俾過錢人哋,係剩番呢啲街數,但係呢啲唔係我負責範圍,所以我要清佢哋公司盤,我同佢哋呢個品牌無關,亦唔會再俾佢哋用我個名宣傳。」