香港人力抗送中惡法，在周日有200萬+1人上街，民怨沸騰，今日特首林鄭月娥再開記者會，終於肯低頭向香港市民道歉，但卻態度強硬拒用撤回字眼，只說已停止草案立法工作。網民都狠批特首廢話，曾參與反送中遊行的藝人都唔收貨。

連續兩星期日上街的張堅庭表示：「未睇直播記者會，不過要我原諒一個將我推落懸崖，然後靠我自己攬實啲樹枝跌唔死爬番上來，佢眼濕濕話對唔住，畀多次機會我幫你搽紅藥水，你驚唔驚，你會原諒佢？」

同樣參與兩次反送中遊行的王宗堯揶揄林鄭：「唔好再玩我哋啦，你忙我哋都忙㗎，唔係淨係你啲時間寶貴㗎，年輕人啲光陰仲寶貴。」對於林鄭拒下台，王宗堯表示：「係，死都話畀多次機會，又話仲有好多嘢想做。撤回！撤回暴動罪！下台！道得咁hea由9佢！」

潘紹聰同樣爆粗鬧林鄭：「當然唔收貨，再次激起民怨。點X樣呢？開個咁嘅記招，講咗啲咩呢？同你發篇稿有咩分別呢？唔出嚟再X係咪好啲呢？成班官冇腦到不能想像！香港人真悲哀。」

去年發現患癌的903 DJ雲妮，6.16都有上街反送中，對林鄭拒撤回惡法表示：「為了自己身體康復一直十分努力，我真的不能一而再再而三的被林鄭影響我的身心健康，太不值得為此人動怒動氣了！」

邵仲衝：「佢唔係可說服到人誠心道歉，今時今日唔係可以轉彎抹角，佢present手法唔好，而家仲拎台灣殺人事件嚟講，根本制裁呢個殺人兇手，大家都明白知點做，台灣都表達咗個方式，絕對唔應牽涉入我哋有咩漏洞，同國内移交問題，係點佢心知肚明。有三點，地位越高權力越大，更加做少少嘢都影響好多人，好多嘢唔可以輕舉妄動，咁重要嘢要移交立法，會影響更多嘢，香港營商環境，外資嚟香港發展，唔好講樓價，我哋消費意慾，零售大家心知肚明。況且而家又係中美貿易戰時間，係咪佢冇去平衡一意孤行，抑或佢有特別任務，香港普羅大眾巿民大家都知究竟係點，無需多講，去到呢個位，大家要獨立分析唔係人哋叫你咁做，你認為可做就用一貫得番手法嚟，世事如棋局局新，呢句話真係好想同特首講，好多嘢局局唔同，唔好一本通書讀到老。上周發生嘅事，今周都有唔同處理手法，尤其呢單嘢牽涉到普羅大眾咁多香港人同咁多外資，冇理由大律師，法官、外國領事又唔明，外界政府，周圍國際商會又唔明，唔通得你幾個明，冇可能，想同佢講世事如棋局局新，坐得呢個位，唔好亂嚟。我哋香港想安居先可樂業，有得安居先可樂業，個人想香港好，國家好，始終我哋回歸咗祖國，情況下權衡利害，要平衡佢，佢呢個位要做呢樣嘢，唔安居，人心惶惶，仲影響下一代，冇得同意佢，好自為之。」

-----------------------------
你撐蘋果 我捐$1
支援反送中抗爭者