唐詩詠同朱千雪今日到尖沙嘴出席商場萬聖節活動，以deep V裙性感現身嘅唐詩詠，令人眼前一亮，佢話並非刻意性感，但自言現時尺度較大：「最緊要靚就得。」問到係咪因為o依家冇男友，所以尺度寬鬆咗？唐詩詠話：「都係嘅，o依家單身，如果拍拖嘅話會尊重同聽另一半意見。」咁以前舊愛洪永城係咪管得你好嚴？佢話：「呢啲我唔記得喇。」

講到中秋，唐詩詠話要工作中度過：「我同陳敏之拍緊劇，或者到時叫佢帶個囝囝嚟陪我。」同時佢話期待嚟緊嘅萬聖節，希望有假期可以出去玩：「我記得前幾年同楊怡一齊去主題公園玩，因為化晒鬼裝，所以冇人認得我哋，玩得好開心。」

至於早前到日本拍旅遊節目嘅朱千雪，就表示喺當地空閒時狂掃藥妝店：「平時衫褲可以上網訂，但日本嘅化妝同護膚品真係比較特別，我以前都唔鍾意行，但依家每次都要入去買啲嘢。」

目前讀緊法律系博士嘅朱千雪，指新學期好忙，好多功課，連身在新加坡嘅醫生男友都冇時間見：「上次因為打風取消晒啲班機，跟住我哋都冇再見過面，唯有平時間facetime同短訊聯絡，不過新加坡好近，有假期就可以飛過去。」

精選娛聞，喺晒《娛果》
http://fb.com/appledailyent