移民，係呢期最大熱嘅詞彙。韓國會唔會係你心頭好？之但係要去一個新地方開展新生活，「衣食住行」中嘅「住」，當然就成為所有考慮條件當中最重要一環。就好似喺 香港 咁，我哋捱貴樓捱貴租，唔通去到外國又嚟多次無限輪迴咩？查實如果做過research，就會發現其他地方無論係買樓定租樓，價格都可以比香港平好多好多，甚至連租樓嘅花款都五花百門。唉，點解 香港人 要咁慘？

香港樓唔係租就係買，但係韓國嘅玩法就真係創意多多，喺租方面，除咗分年租、月租之外，仲有全租！年租就係一次過畀一年租金，呢種租法喺濟州島比較常見；至於月租就顧名思義月月畀錢啦，只要你放低保證金（亦即香港嘅按金）就OK喇，不過韓國租樓好得意，如果你畀嘅保證金越多，咁租金係可以收平啲嘅，甚至乎如果保證金高到一個點嘅話，零租金都仲得！至於全租，就正正上述嗰種「保證金租法」當中衍生出嚟，只要你畀嘅保證金高達樓價嘅五六成、有部份甚至要求高達八成，咁業主就淨係收咗你份保證金，然後免費租畀你住，完約後業主仲會全數畀返份保證金你。皆因好多當地業主認為收租啲租金太少喇，「無乜肉食」，倒不如租客畀大大嚿按金佢哋，業主擺喺銀行做定期都仲多過收租！

呢招聽落好似好筍，放低一嚿錢就可以零租金有屋住，好似好着數咁喎，難怪連韓國人本身都較鍾意用呢種租法。之但係都要小心，唔係百分百安全㗎。有啲地產經紀會訛騙客人有全租樓盤，客人畀錢落定後，經紀就逃之夭夭，直到業主嚟收數，先知道原來經紀同業主簽嘅係月租合約，而一大筆保證金就「着咗草了」。早前熱播嘅韓劇《機智醫生生活》就講述有醫生墮入全租騙案嘅情節，連韓劇都講，可想而知呢個問題並唔係孤例。另外亦有可能發生業主投資失利嘅情況，假如業主將筆保證金「蝕咗」，喺滿約時係無辦法畀返錢你，咁就要等到有下一位羊牯…吖唔係，係下一位全租嘅租客出現，業主先可以用嗰筆保證金嚟退返啲錢畀你！

開講都有云「睇人XX最開心」，咁有時又唔係話淨係睇人衰先至開心嘅，見到人搵到自己鍾意嘅靚盤，建立自己嘅安樂窩，其實我哋都好有同理心，好識得戥人開心嘅！好似小編個老婆睇親都會嗌「嘩！好抵呀！」「老公，我都想搬去呢度」「嘩人哋有花園個喎！」。老婆大人睇得治癒，我望住佢我仲治癒呀！