澳洲悍將柏寶今晚好搏命，頭兩場分策賢廐「至尊駿爵」同吳廐「勁駿皇駒」取得一冠一季；第三場他冇座騎，到了第四場四班1000米，柏寶重返戰陣，騎徐廐「創出商機」沿欄由頭帶到尾，4.5倍勝出，至此柏寶同徐雨石季內合作33戰，豪奪8勝13位，上名率有六成之多，絕對係一個可靠組合。
3檔馬「創出商機」今季跑到第12仗終勝回一次，此駒近三仗全配柏寶獲一冠兩亞。跑到第四場為止，3檔馬今晚百分百上名，交出兩冠一亞一季，準到冇朋友。
落飛黨呢場損手，事關「氣勢如虹」由原本20倍左右賭到7.1倍着啡燈開跑，結果後上不及做二奶，至於大熱門「創意寶」受外檔所累，沿途蝕位跑，衝落唔係咁多只得第三，第四名「欖球鑽石」，四重彩15,150元。
徐雨石指「創出商機」對上兩場排外檔都入Ｑ，今場檔位内移成功埋欄有利，加上馬兒在四班始終有實力，遂順利取勝。