自認食緊墨魚汁意粉都俾網民爆相爆片斷到正影到兩人拍拖拖,白只同顏卓靈呢pair,十個驚喜。更難得嘅係呢對唔止冇扭擰,仲大方認愛,活用socialmedia之餘更真人現身談情谷戲,贏晒啦。
女嘅就戀愛大過天,ex係band錢行,咁男呢?其實佢有個女朋友……之前。係喎,咁呢個女朋友係邊個?係咪真係春夏?咁係顏卓靈追白只先?定係調轉?
今日就有周刊報道話,其實白只同顏卓靈一齊之前,確係有個女朋友——yes,係春夏。春夏唔係話派咗好人卡俾勇於表白嘅白只咩?據呢篇報道引述嘅知情人士稱,唔係喎。
報道指,喺香港人生路不熟嘅春夏,對於有白只貼心照顧亦相當受落,雖然,佢一早都講明,已經有一個拍拖好耐嘅男朋友……咁即係……如果係真都唔奇,一個願打,一個願捱……就係咁簡單。
咁顏卓靈又點樣同白只一齊嘅呢?據報道指,兩人係透過教友介紹識嘅,之前顏卓靈想去唱片公司試音搵機會出碟,近水樓台向白只求教,男方嘅才氣深深吸引顏卓靈,就係咁展開唔知係女追男定男追女嘅曖昧過程。最初顏卓靈都唔敢咁大膽追白只,只係逢約必到,由大班人gathering開始,逐步深入了解白只嘅感情世界。據稱,顏卓靈係知道白只有女,只係唔肯定女方係邊個。
Gathering得多,顏卓靈索下索下,知道咗白只女友真係春夏,掂啦!(你懂的)春夏拍完戲都走啦,唔會長駐香港,佢同白只嘅一段情,都肯肯定無聲結束。如果你係顏卓靈,都知點做啦。女追男,難度大大降低。今年四月金像獎慶功,顏卓靈仲半夜三更去接出席完慶功宴嘅白只,當晚,白只係喺台上公開爆咗句:「我愛春夏!」
So?