恒基地產（012）主席李兆基（四叔）嘅細仔李家誠連續兩年被減薪？！恒地噚日公佈最新一年年報，一班董事嘅總年薪基本上冇咩大變動，做咗33年嘅老臣子林高演維持超過3,000萬元年薪，比較特別反而係李家誠，即係徐子淇老公，過去兩年嘅總年薪都明顯減少喎。
李家誠舊年總年薪1,490萬元，比2013年度減少6%，再睇番佢2013年總年薪，竟然又比2012年減少9%，再前一年就有人工加嘅。
一般家族企業公司，大股東家族成員嘅人工通常有加無減，李家誠呢兩年嘅人工都要減少少都幾特別。
佢哥哥李家傑就維持1,700萬元年薪左右，四叔本人就袋1,900萬元。不過又咁講，仔女遲早都會繼承公司，袋幾多年薪都係數字遊戲，大股東最重要都係有億億聲嘅股息收㗎啫。