鄺文珣懷第3胎，之前已宣佈今胎會生女，而預產期將近，佢今日就去咗中環太子大廈嘅親子活動，佢腹大便便同巨型熊公仔影合照，接受傳媒訪問時由於太熱，更要拎住風扇仔消暑。鄺文珣提到o依家體重已去到131磅：「算係好好進展，早排嚟嚟去去都係128磅，想谷佢大隻啲，最近一次產檢佢有6磅，希望佢再大隻啲，因為之前囝囝有7磅大隻啲，啲人話女骨幼啲，變咗會輕啲。」

提到佗今胎，鄺文珣就話重咗30磅：「初初諗唔好重咁多，但係發覺BB咁細隻，出嚟時候難湊，所以谷自己食嘢，乜都食得好啲。」講到預產期，佢就講到係中秋正日，o依家已開始慢慢執定走佬袋：「仲有嘢未執好，我鍾意慢慢執一件，唔想自己咁stressful，老公都好似之前兩胎，都會剪臍帶，佢近排成日摸我個肚同佢傾偈，要BB認住佢把聲。」此外，鄺文珣提到近日連續兩晚失眠瞓唔到，醫生都叫佢休息多啲，不過佢就忙搞佢慈善機構工作：「o依家active過之前兩胎，好想爭取多啲時間做多啲，因為湊女時知會少咗時間處理。」