「我都想好似羽生結弦一樣，喺19歲時參加冬季奧運會，仲要好似佢咁，一鳴驚人！」14歲香港「花滑小公主」馬曉晴（Maisy），噚日喺又一城舉行嘅香港花滑及速滑錦標賽，短節目超晒班咁以49.48分暫列青年女子單人滑第1名；佢正盼望自己4年後代表香港出戰平昌冬奧，為港爭光。

羽生喺今年2月索契冬奧，爆冷為日本奪得男子花滑金牌，被冠以「天才美少年」稱號；當大家正討論佢嘅樣貌有幾受男生同女生歡迎時，Maisy反而崇拜羽生經歷2011年「3.11」地震後不放棄嘅精神。出生宮城縣仙台市嘅羽生，地震時屋企被漽，要住喺收容中心，Maisy話：「地震後到索契冬奧只有兩年幾，羽生要承受傷痛繼續練習，佢嘅意志好值得學習。」
上年9月曾獲世界青少年花滑大獎賽波蘭站第6名嘅Maisy，噚日憑超難度動作贏得全場鼓掌，今午佢會繼續參加自由滑。至於準港隊教練孫丹丹，噚日亦有到場為香港速滑小將打氣（右圖），佢正等緊專才計劃嘅批文，搞掂後就會正式上任。