當年今日
關於我們

【電視風雲】阿叻又跪又死 原來係殼王下令?

蘋果日報 2013/11/21 06:00


陳百祥(阿叻)為咗谷無綫台慶收視,先「跪」後「死」,之後又話如果過台慶收視過30點,就叫無綫捐300萬,最終台慶收視收得平均29點,最高31點,無綫捐出310萬予7個慈善機構,亦有報道指,無綫加碼總共捐出322萬。

阿叻連續為無綫講出咁多爆炸性說話,佢講到明係因為無綫係捧紅佢嘅,擦佢鞋都好應該,不過今日就有報道話,原來阿叻搞咁多嘢,只係一場戲!報道入面嘅知情人士表示:「其實殼王(陳國強)入主無綫後,已經覺得公司一池死水,所以就想喺啲綜藝節目搞啲noise出嚟。阿叻同佢識於微時,呢幾年又同阿叻合組經理人公司,當佢兄弟班o架啦,咪度條橋出嚟谷台慶收視,諗住愈鬧愈多人睇!」

台慶前一日阿叻被問到此事,佢就直認:「一場戲嚟啫,宣傳效果幾好呀,過咗台慶就乜都冇!」吓,但而家聽聞一班客戶都抽起廣告,咁嘅效果都叫好?問阿叻上次同王晶為港姐鬧交,又係為宣傳?阿叻話:「好明顯係啦,佢係我恩師嚟o架,點會同佢真係鬧交丫!」

上年王晶喺微博嘲港姐質素差,阿叻反寸:「有邊個識佢而會理佢講乜?」又提醒無綫老闆陳國強同樣都係王晶老闆,王晶就反譏:「唔使擦鞋擦到咁。」之後仲反晒面,原來,都係做戲?