歐洲國家盃D組賽事，如無意外，德國同捷克將攜手出線！實力不俗嘅愛爾蘭，已經多打１場而落後榜首德國３分，今晚對住實力一般嘅威爾斯，不容有失，我估全取３分無問題！
愛爾蘭主勝，熱熱地，1.7倍，我覺得已經係唔錯嘅賠率！球迷如果支持愛爾蘭，我諗，無疑係對傑斯投下不信任一票。
由當年嘅「傑斯仔」睇到𠵱家嘅「傑斯叔」，8次聯賽冠軍，4次足總盃冠軍，1次歐聯冠軍，獲獎無數，只係與國際賽無緣；今次，可能係佢最後一次參加歐洲國家盃，我期待佢同比拿美，可以製造一個入球。不過，如果估邊隊贏，有分析也好，無分析也好，相信都係睇主隊高啲！

同組賽事，捷克對德國，應該係今晚焦點，呢場完全係五五波，不過，情感上當然想捷克贏。可惜，分析呢組嘅積分榜後，兩隊波無必要搏盡，只要握手言和各得1分，跟住喺較弱嘅對手身上全取3分，已經夠分出線！所以，我會估「和波」及入球「細」。
周鵬
商業1台《球迷集中贏》主持
電郵：[email protected]