姚本輝今戰成績唔錯，第三場佢嘅「天心星」喺田泰安胯下勝出外，第九場姚廐「好精神」掛頭牌原本孭133磅，輝哥專登搵徒弟呂卓賢騎，貪佢有七磅減，結果後者不負所托，半條直路後上齋推追過「嫡愛」及「醒目精伶」掄元，「好精神」今季齋跑泥地，五戰兩冠兩亞，殺出新血路。今日同時係呂卓賢廿四歲牛一，師傅姚本輝呢份生日禮物夠晒窩心，難怪兩師徒影頭馬相時笑容特別燦爛，而姚本輝連勝六日，亦氣勢如虹！