新海誠憑住執導賣座動畫《你的名字。》威盡影壇，電影累積249億日圓成為史上最賣座日本片第二位，成績僅次於宮崎駿作品《千與千尋》錄得嘅308億日圓票房紀錄。

新海誠結婚多年，其妻係息影女演員三坂知繪子，二人育有一個6歲囡囡，乖女新津知世更入行做童星，不過今日有報道指新海誠背妻發展婚外情，被指搭上一名出版社嘅靚女編輯。

據報導稱，新海誠跟外遇喺去年春天認識，《你的名字。》大熱後嘅秋天即發展成不倫戀，平日放工後兩人會相約食飯、睇戲、更到女方寓所見面，新海誠亦帶埋「小三」出席行內人派對。

對於被指有婚外情，新海誠事務所已隨即否認，形容雙方只係普通朋友關係，感情並不深厚。新海誠今早都親自透過Twitter回應，承認報道指食飯等乃事實，但絕非情侶關係。事隔10分鐘，新海誠再留言稱冇諗過自己私生活會教大家關心。