沒有舖天蓋地宣傳，沒有巨星歌手唱歌，但就吸引到陳奕迅（Eason）、容祖兒同林欣彤（Mag）捧場，佢哋睇嘅係作曲人陳輝陽作品展，聽一場令幾百萬人流淚過的歌，祖兒同Mag都被歌曲催淚，喊到變豬頭，連Eason都感動到要問祖兒攞紙巾。

一連兩場《上一次流淚 陳輝陽X女聲合唱作品音樂會》噚晚喺灣仔伊館開鑼，由28位女聲合唱團配鋼琴環迴唱。完騷後輝陽接受《蘋果》電話訪問表示：「祖兒同Eason之前喺上海做騷，本來話未必嚟到，結果祖兒搭早啲機趕得切嚟，佢一到就send message畀我話嚟睇，我叫佢記住帶兩包紙巾，嚟睇我嘅騷會喊，佢話咁嚴重，唔信囉！」

祖兒帶埋媽咪睇騷，輝陽坐喺兩母女中間，佢表示：「祖兒同觀眾一樣，開頭當普通騷睇，睇到《灰姑娘》同自己唱嘅《痛愛》，佢開始忍唔到，問阿媽攞紙巾，尤其是下半場，唔係自己歌都好感動，好似《喜歡戀愛》、《絕》，佢話我個騷可以巡迴演出。」祖兒嘅《痛愛》、《再見我的初愛》都係輝陽作品，原來輝陽曾經被祖兒媽咪鬧爆，佢自爆難忘趣事：「《再見我的初戀》當初錄第一次，祖兒返屋企爆喊，然後佢阿媽打電話畀我：『你做乜整到我個女喊？』其實我完全唔記得，已經係14年前嘅事，因為噚晚佢阿媽都有嚟，講番呢件事，我解釋錄歌唱到咁，情感上太感動。」

輝陽亦很感激Eason捧場：「Eason對我哋非常好，班機delay，嚟到睇下半場，佢都好驚訝女仔唱歌表現咁好，佢坐喺祖兒隔離，佢聽到下半場第三、四歌，見佢撞一下祖兒，祖兒攞張紙巾畀佢，我覺得音樂力量好犀利。阿Mag話好想喊好耐，但佢不斷忍，想睇吓自己忍耐能力去到邊，佢話睇到下半場第三隻歌忍唔爆喊。」

不止觀眾被感動，主角輝陽都要戴眼鏡擋眼淚：「我好少戴眼鏡，因為綵排喊得太犀利，所以噚晚戴番眼鏡先，綵排有個指揮排到下半場第四、五首歌，佢突然停咗，我睇吓乜嘢事，原來佢啲眼淚滴晒落眼鏡框，我就諗如果喊唔係幾好意思嘛，不如戴番眼鏡。」

早排先同劉浩龍分手，似乎歌曲觸動咗祖兒神經，佢寫道：「眼睛不知不覺地充斥着淚水，亦是感激亦感動，這是我和大家的青春，很難用片言隻語去解釋這個感覺，騷後班妹豬嘩你個妝好靚喊完完全唔甩嘅好勁呀(梗係啦我自己化㗎嘛)，若果，大家想感受這種being young 和stay young 的淚，明天還有機會。」

rundown
上半場：青春遇見你 (Being Young)
《心癮》
《忘記不起》
《我有我愛你》
《我的麻煩男友》
《他不准我哭》

《灰姑娘》

《痛愛》

《如何掉眼淚》
《分過手請舉手》

《抱抱》
《爭氣》

《再見我的初戀》

中場間奏曲：《華麗上班族「最後的華爾滋」四手聯彈

下半場：青春再見你 (Keep Young)
《自戀影院》

《喜歡戀愛》
《破相》

《小星星》
《上一次流淚》
《情意結》

《絕》
《我的生存之道》
《美麗有罪》

《相愛很難》

《告別我的戀人們》

《K歌之王》

精選娛聞，喺晒《娛果》
http://fb.com/appledailyent