無綫劇集不時都以七八十年代為背景，最新傑作係王心慰監製新劇《黃金有罪》。唔係幾十年前張兆輝嗰套《黃金十年》，呢套係懷舊懸疑劇，之前有報道稱女主角係田蕊妮，仲有朱晨麗、陳瀅、劉思希，同埋一直喺雪櫃，為愛情就連事業都可放下嘅鄭俊弘。據知張兆輝真係有份演出喎。

今日《黃金有罪》試造型，得蕭正楠、姚子羚、黃智賢、洪永城等出席，個個戴晒假髮，仲係冇髮線嗰款，齊以七、八十年代造型示人。可能係因為試造型嘅關係，所以啲髮型真係……可以用「慘不忍睹」形容。

洪永城飾演蠱惑仔，自言角色又囂又寸；姚子羚就做Call台妹，自稱未用過Call機，一用已經係手機喎——事後佢解釋係因為月費貴，所以唔用Call機。

個個戴晒假髮，好似易咗容咁，好難認，洪永城話：「造型後大家都唔認得我，好似都喺度恥笑我咁。」佢話會同陳瀅有感情線，而且仲有唔少激情戲：「監製話唔使我上半身做戲，只要下半身可以。」露股？「要嘅話我都想。」

噚日黃翠如話拍劇時不慎被木剌傷眼，今日問番蕭正楠，原來佢都唔知此件事：「當然擔心，我真係唔知。我都知道佢最近好忙，等有時間煮頓飯好好餵飽佢。」