民主黨主席劉慧卿同新任立法會議員林卓廷，今朝租咗鄉議局大堂，諗住十點起宴請近二百名義工，民主黨「鄺神」鄺俊宇、「黨花」曾素麗都有現身，點知全部人到場後，先知鄉議局大堂冷氣壞咗，義工要喺近30度高溫下開餐！

熱到全身濕哂的卿姐見到咁情況，當然好激氣，覺得鄉議局尤如「大整蠱」。鄉議局後來派出發叔「妹夫」薜浩然到場解畫，話今日下畫兩點後，先「可能」搵到人去搶修冷氣。

卿姐聽到當然唔收貨，因為屆時義工已開完餐，民主黨最終唯有安排義工，去鄉議局為數唔多、但仲有冷氣的細房開飯，無得坐冷氣房的義工，就唯有搵用鄉議局提供的少量風扇頂住先。鄉議局由於喺民主黨活動結束後，仍未整返好冷氣機，決定只收民主黨半價租場費。