梁詠琪（GiGi）早前宣佈加盟環球唱片，並會製作全新專輯，日前GiGi在尖沙嘴接受訪問，解釋何以事隔近10年再度簽約唱片公司的決定。她透露會跟環球合作推出一張10首新歌的專輯，而且合約年期長達3年，GiGi稱自從有家庭後要兼顧的事情更多，為平衡工作和家庭，所以選擇和唱片公司合作。

GiGi表示雖然近年都由自己的製作公司包辦音樂創作和發行，但實在分身乏術：「現階段嘅我時間真係唔夠用，真真正正可做嘢時間係夜晚10點後，要等囡囡瞓咗先，既然係咁不如畀人做，自己專心做幕前，反而可以多番啲時間，始終有專業團隊幫手。」

成為媽媽後，GiGi坦言連接工作的類型和性質亦多一份考慮：「做忠做奸都唔緊要，但故事意識一定要正確，亦盡量都唔會拍親熱戲。」同時她覺得這樣是給囡囡Sofia一個榜樣，又會向她解釋拍戲是媽媽的工作，因Sofia漸漸長大，開始對事物好奇和發問：「佢好細個時，有睇過我做演唱會，睇住媽咪上舞台應該對佢印象好深刻，所以而家我扮靚啲化妝出街佢就話『媽咪係咪去開Concert？』我話『唔係成日都開㗎，好辛苦㗎。』我諗對佢impact（衝擊）好大，影響佢好鍾意唱歌、好有表演慾、好鍾意去學新歌和學跳舞。」

至於GiGi和丈夫Sergio可有造人計劃，為囡囡多添一位弟妹？她笑言：「呢樣嘢隨時夜晚都可以，見到面都可以，但冇特別計劃，一切順其自然，阿女都有講過想要個弟弟妹妹。」又直言現時最重要是湊女為先：「因為Sofia要開始搵學校階段，明年升K2應該要開始小學面試，真係要多留時間喺香港。」

訪問尾聲，GiGi更透露了囡囡多愁善感的一面：「有次去旅行，瞓覺前佢突然喊住咁問『係咪我大個咗就見唔到爸爸媽媽？』因為佢知道我哋會死，我話唔會㗎，我哋仲會一齊好耐時間，唔好咁諗。」當時仍在飲泣的Sofia更問：「係咪長大咗就唔會見到爸爸媽媽？」未待GiGi回答，Sofia又突然180度轉變話：「不過咁，我知我將來會有個husband，咁我就唔會lonely。」講完隨即倒頭大睡，GiGi說：「結果嗰晚我同老公就瞓唔着，覺得佢思想好成熟，都認為可以早啲同佢講人生嘅事畀佢知。」

採訪：曹家誠
攝影：仇志德、廖達燊
化妝：Dephine Chan
髮型：Pius & Lupus of Orient4
場地：House 1881

-----------------------------
7月4日起 《蘋果動新聞》只限升級壹會員閱覽
繼續撐蘋果！