婚紗攝影服務參差，近年不少網民都會公開照片提醒其他準新人咪中伏。有準新娘在fb專頁「巴打絲打 Facebook Club」發文分享一次婚攝中伏經驗，指在揀相期間發現多張相片角度及構圖差，怒轟所謂韓式攝影「好獨特，唔識得欣賞」，更質疑店方所稱的韓國攝影師實際來自內地。帖文引起不少網民爆笑，更發揮創意替苦主修圖，但亦有網民認為婚紗相經後製效果有很大分別。該婚攝公司回應指該攝影師的確是韓國人，認為客人故意挑選某些不太好照片作公審，會保留追究法律責任。

網民「Ling Ling」在上載由「S.A. Wedding」負責拍攝的婚紗照，指以1.5萬元購買韓式攝影服務，由韓國來港團隊操刀，但拍攝期間發現化妝師及助手來自深圳，而攝影師「似係識講啲韓文扮係韓國人」，團體表現亦不專業「連反光板都冇塊」，已深感不妙，結束後即到台灣找其他公司補拍。Ling Ling收相後發現照片無論是燈光、角度還是構圖都極差，「南生圍影完出黎變荒山水氹上面有條爛橋咁」，尖沙咀廣東道的「路人大合照」焦點更落於兩人身旁的遊客，而在1881的照片「獨特既構圖技巧不予置評」。Ling Ling遂向該公司投訴，惟獲覆是韓式風格及效果，又稱以韓式眼光來說「真係唔差的」。當她要求提供攝影團隊由韓來港證明及攝影師全名時，該公司只稱攝影師叫「金大師」，多番推搪後只提供韓文全名。

Ling Ling向本報表示感到非常憤怒，指「影到我老公好似浮屍」，「求其私影都影得靚過佢」，又質疑該公司雖稱團隊由韓國來港，但獲多名網民告知該攝影師其實長駐廣州工作，加上多番拒絕提供證明，故認為婚攝公司不老實有誤導成份。婚攝公司回覆本報查詢表示，根據商品說條例會將所有原檔給客人，指Ling Ling上傳的照片只是其中一部份，認為她故意挑選角度或構圖不太好的照片公審，質疑與她事前要求取消行程及退款不果有關，表示將保留追究法律責任。婚攝公司又強調該攝影師是韓籍，在行內有十多年經驗，如有技術不足或未能滿足客人，願意接受評價。

網民點睇

Kamma Ma：有啲相真係揸電話都影到~咁上下喎~真係伏味濃啦呢鑊
Sheung Kwan Ng：抵x死，香港無人識影相咩？「韓國」兩個字真係好賺
Tovy Yeung：好似細個返鄉下，山後面個爛鬼魚塘
Vincent Law：金大師唔提議響藥房外面影已經好俾面
Tszchiu Law：真係無知想問下，乜嘢叫韓國攝影？同香港攝影有咩分別？有泡菜味多啲？
何琪琪：眾裡尋他嗰幅構圖最有意境
Ellson Chung：見到個韓字就濕無辦法
Lee Yan：下次 小心D囉
Kevin Ng：老老實實你比15000我我都會咁樣影你
Ringo Tsang：其實向香港影又洗乜特登搵韓國攝影師呀，又唔係出國影
Ho Andy：哇！呢啲咪藝術囉！