當年今日
關於我們

【收市閒情】兩會雞精班:工作報告提「習近平」幾多次?(千頌C)

蘋果日報 2019/03/05 21:00

習近平兩會收市閒情千頌C

國務院總理李克強,周二宣讀政府工作報告。洋洋灑灑近17,000字,重點有啲咩,就真係一百人一百種解讀。不過無論如何,以下幾點,係真係行過路過唔好錯過:
首先,成份報告個重點,當然係「在中國共產黨領導下,中國人民有戰勝任何艱難險阻的勇氣、智慧和力量,中國的發展沒有過不去的坎。」起來!起來!起來!我們萬眾一心,然後GDP就會…就會下調。
今年李克強預期GDP增長目標只有6%至6.5%!好一個「6%至6.5%」,意思即係話,今年增長有機會衰過上年嘅6.6%,亦即係話好大可能係自1990年以來新低。
另外,以往GDP預測都係用一粒數就算,今次一開就開一個range。咁有咩潛台辭呢,好簡單,以前開一個數,結果上落一兩格,市場都算收貨;今次開一個range,仲要係一個無論如何,都係差過上年既區間,即係話「今年已經會衰架啦,但點衰都冇可能衰過6!如果跌穿6呀?咁就GG啦!」所以今年中國應該會風風火火,全國齊心去保六!
第二,呢份報告另一個不得不提嘅重點,當然係「習近平」!今時今日,中共講嘅係「習核心」、「習大帝」,作為政府工作報告,講過去一年嘅成果,點可以唔提到「習大大」?
近年政府工作報告提及「習近平」呢三個字次數,好明顯穩步上揚,14、15年有5次;16年有6次;17年有8次;去到上年大躍進,突破個位數,達13次之多。至於今年亦維持於13呢個水平。此前中共領導人喺政府工作報告中,被提及次數超過10次嘅只試過兩次,分別係75年毛澤東嘅17次,以及97年鄧小平嘅11次。
當然,好似一間公司咁,派開3仙息,今年突然縮皮,都會惹人猜測;何況係顧及習大大嘅威信!
目前中共已打破主席「連續任職不得超過兩屆」規定,永續習帝不是夢,即係話未來嘅政府工作報告,提及習近平嘅次數,只會有增無減,假以時日,報告應該會有4萬字,有一半都係「習近平習近平習近平習近平習近平習近平…」
第三,今次報告,反映一件事!就係陳茂波同李克強正式sync咗!波叔近日財政預算案提到,要用6億改善200個公廁,即係每個公廁要花300萬!喂,呢個關今次工作報告咩事呢?
嗱!今次工作報告再一次提及,要「因地制宜開展農村人居環境整治,推進『廁所革命』」習近平早於2015年就提出搞Toilet Revolution,到2017年就已改善了6.8萬間公廁,之後發生咩事呢,除咗廁所香噴噴外,就係官員腳印印!
唔少地方都出現星級豪華公廁,74億改造5公廁嘅budget都可以出現,證明中國公廁非同凡響。而今次波叔能夠同習主席英雄所見略同,實為港人之福,人人去得暢快,香港就越來越和諧!
by千頌[email protected]堆填區
http://fb.com/winbigwok