韓國綜藝節目《Running Man》(RM)嘅成員拍攝時不時都要濕身，除咗夏天指定會到泳池拍攝外，就連冬天拍攝時，輸家都要被淋凍水，雖然出嚟嘅效果係好搞笑，但成員都不時會抱怨。

《RM》將於今日播出最新一集，節目組透露今次嘅內容係自由旅行，由目的地、演出嘉賓都由成員自行決定，節目組又指如果輸咗嗰組就會被大懲罰，劉在錫、李光洙就立即聯想到懲罰係要淋凍水，即時出聲抗議，劉在錫更自爆因為《RM》成日都要濕身，所以拍攝時都要帶定兩條底褲以防萬一，引起爆笑。

另外，早前宣佈即將再做爸爸嘅劉在錫，噚日透過綜藝節目《無限挑戰》表示收到好多人祝賀嘅短訊，又指無論係仔定女都無所謂，不過就被其他主持人笑：「拍攝咁辛苦，在錫哥又成日都嗌好攰，咪仲係咁有精力。」相當搞鬼。

更多韓流，喺晒《娛果》
http://fb.com/appledailyent