當年今日
關於我們

岑建勳求救:唔好搞阿伯
劉美君尾場騷摸憶蓮

蘋果日報 2008/04/22 00:00


劉美君前晚在紅館舉行尾場「劉美君大開色界演唱會2008」,繼續她大膽豪放的演出,兼且男女通殺。首先好友林憶蓮身穿大露背低V裝出現,自彈自唱一曲《沒結果》,此時劉美君爬上鋼琴,摸憶蓮的面頰;接着又從後熊抱她,最後更撫摸憶蓮胸部,做出一連串挑逗動作,大玩同性誘惑。兩人再合唱《灰色》,現場反應熱烈,大部份觀眾都站起來拍掌歡呼。
玩完同性誘惑後,劉美君便臨時拉伕,請好友岑建勳上台大跳辣身舞,她一手將岑建勳推在紅色梳化床上,只見岑建勳滿面通紅,表現相當尷尬,他惟有掩着雙眼,之後又交叉雙手護胸,至於劉美君則繼續向他「進攻」,在岑建勳身上不停前後搖動,他立即用雙手護下體,更搶了劉美君的咪大叫:「救命!」認真搞笑。之後岑建勳想逃走,但被劉美君抓回推落梳化床,他惟有苦笑說:「唔好搵啲阿伯嚟搞!」
演唱會尾聲,台下fans送了一個獎座給劉美君,示意她在紅館舉行完演唱會即代表「畢業」,她又說:「我一生人幾幸福,但感情麻麻,工作上就有好多貴人。」據知劉美君的媽咪和女兒也有捧場,老公則未有現身打氣。而當前晚三度「安哥」,當劉美君唱最後一首《最後一夜》時,全場跟她大合唱,令她感動落淚。
事後提到今次個唱意識大膽,劉美君說:「唔係,我覺得恰當,唔係刻意,我同梁家輝同岑建勳都熟,我都豁出去。」至於林海峰為她獻出第一次大跳辣身舞,她笑說:「我都為佢獻出第一次,蝕底晒。」問到在台上說自己「唔夠儍唔夠天真」是否暗寸鍾欣桐的「天真論」?劉美君表示絕無此意,她度完稿後才知阿嬌說過類似的說話,另外,她透露主辦單位有意開演唱會part2。
採訪:李珮洳 攝影:仇志德
蘇永康前晚擔任劉美君尾場演唱會嘉賓,可惜卻「口水多過茶」,慘被現場觀眾狂噓。康仔和劉美君合唱一曲《偷窺》之後便開始說:「當年我同佢係同一個經理人,我當佢家姐咁。劉美君當年係唔少少男嘅幻想對象,試過有一次我同佢去disco,佢又着住件露背裝,現場幾十個男人打雀咁眼望住佢,之後有個二十幾歲某慈善機構總理畀卡片我。」
康仔續說:「第二日個總理打畀我,話想約劉美君食飯,仲問幾多錢,我咪攞最核突說話喺45秒爆出嚟,點解請佢食飯嘅重任要交畀我?」劉美君笑說:「你似扯皮條。你知唔知點解咁多人昅我?因為我吸咗一種嘢。」康仔聞言說:「吸乜嘢,講清楚。」劉美君才笑說:「我吸𡃁仔啲日月精華,樣唔得嗰啲就做細佬。唔好嘥我時間,唱歌啦!」

嫌甩頭甩骨

雖然現場已傳出噓聲,但康仔仍說:「好彩有個咁嘅家姐睇住我,你哋唔係噓我?我係咪咁甩頭甩骨得咁犀利?」有觀眾大叫:「係呀!」康仔再說:「我個女友喺嗰邊!」現場再傳出噓聲,康仔才收口唱《假使有日能忘記》。事後問劉美君是否聽到康仔被人噓?她說:「唔知,啲人玩啫。」

觀眾小八卦:胡敏珊戀得張揚

龐維仁和胡敏珊這對戀人,前晚拍拖到紅館欣賞劉美君演唱會,兩人不避忌坐在一起,對鏡頭也不抗拒,之後兩人還結伴出席慶功宴,看來兩人表現如此大方,雙方感情必定發展得相當穩定。另外,岑建勳和前妻劉天蘭也一同出席看騷。