時間：99年6月19日

地點：紐約大華埠選美會後台

人物：章小蕙、陳曜旻

經過
章小蕙97年同鍾鎮濤（阿B）離婚，哄動全城，其實早於96年，女方已經同「白頭陳」陳曜旻暗中交往，展開長達七年嘅離合。到02年，白頭陳申請破產，與此同時章小蕙向傳媒宣布兩人分手，各行各路。
有時愛一個人，真係可以為對方做好多儍嘢，白頭陳最經典嘅，莫過於為章小蕙「挽鞋」。99年6月，章小蕙去美國登台，白頭陳全程護花。完騷後，章小蕙返入後台，除低嗰對價值4,000蚊嘅ManoloBlahnik高踭鞋鬆吓，體貼嘅白頭陳就幫女友挽鞋同拎雜物。

當眾奚落

及後章小蕙忙於接受訪問，白頭陳大呷亁醋話：「咁我哋咪唔可以撐枱腳？你（章小蕙）都唔諗吓陪我嘅。」章小蕙見白頭陳唔肯走，一句躓埋去：「你喺度做乜？」事後記者問白頭陳點忍女友嘅臭脾氣？佢話：「佢肯睬我，我仲出聲？」咁冇吉士，真係丟晒男人嘅架。
章小蕙自從同白頭陳分手後，身邊嘅外籍猛男如車輪轉，04年仲接拍楊凡執導電影《桃色》，大膽裸露，結果分別喺馬尼拉同印度兩個電影節攞獎。不過之後佢嘅事業仍然冇發圍，睇嚟佢叠埋心水談戀愛仲好。
本欄逢周一至周六刊出