應采兒噚日到將軍澳電視廣播城宣傳劇集《鹿鼎記》，仲同四個扮韋小寶嘅司徒瑞祈、鄭健樂、黃長發同梁烈唯玩遊戲，贏咗可以得到紅唇貼紙，梁烈唯好鬼馬同應采兒講：「你山長水遠入到嚟，冇理由唔咀喎。」應采兒就笑笑口請梁烈唯食檸檬，佢話：「真係唔想錫囉，我有男朋友㗎，男朋友唔鍾意！」之後寫揮春，無綫專登預備咗張寫有「陳小春」嘅揮春畀應采兒揸住，難得佢唔介意，仲好大方講感情事。

帶小春美國見婆婆

應采兒話農曆新年會返美國，小春咁啱又會去美國登台，所以會帶埋小春去見婆婆。問佢係咪好事近？應采兒話：「唔係，佢都係第一次見我婆婆，我冇講過話兩年內要結婚，佢又冇講同冇求婚，真係冇咁快。」佢仲話小春向來有女人緣，尤其係老人家，因為佢個慘樣好易激發母愛，所以媽咪對佢印象幾好，反而同爸爸溝通唔到。
問應采兒咁小春有冇睇過今輯《鹿鼎記》，佢話：「佢話覺得自己好啲，我都覺得小春嗰種性格好啱做韋小寶，反而黃曉明唔夠搞笑，所以見到佢唔止要背對白，仲要排埋動作，我覺得楊過呢類角色會啱佢多啲！」此外，司徒瑞祈話農曆年會留喺香港，佢話：「我一定唔會過澳門，除非有工作，我希望有機會去賭場做騷，等我喺佢哋度搵番啲錢。」