韓國男團JYJ成員朴有天前年喺當兵期間，先後捲入四宗性侵案，搞到形象受損，雖然事後朴有天就被判無嫌疑，不過佢喺韓國就要潛水一排，之後佢就被爆撻着南陽乳業家族外孫女黃荷娜，有傳二人於去年秋天結婚，不過婚期就一改再改，又傳出二人感情生變，不過今年年頭兩人又疑似孖住遊蘇梅，日前黃荷娜又疑似收到成車花，唔知係唔係朴有天所送？

雖然之前朴有天愛得癡纏，更被發現紋身紋咗女友個樣喺手臂上，不過朴有天嘅粉絲就唔多鍾意黃荷娜，覺得佢成日晒命。而根據台灣傳媒報道，朴有天前日同噚日喺日本東京舉行粉絲見面會，係佢捲性侵案後第一個公開嘅活動，而佢喺見面會上就似乎想挽回粉絲嘅心，竟然喺台上誇口話：「今後除咗工作外甚麼都唔會做，包括戀愛，咁樣努力下去都唔錯。」台下粉絲聽到自然拍爛手掌，仲高呼好嘢，反問朴有天係唔係分咗手，朴有天就回應話：「冇講得好清楚，但你哋應該明白。」不過台下粉絲齊心話唔明白，朴有天就再冧粉絲話：「從今以後除咗你哋就冇其他人！」疑似暗示已經同黃荷娜分手。

據知喺朴有天粉絲群中就盛傳二人分手消息，有人更私底下傳訊息詢問黃荷娜分手係唔係事實，點知黃荷娜就唔認分手，仲反問：「邊個講？」之後黃荷娜仲先自爆啱啱先同朴有天講電話，力證感情冇變。唔少網民都猜測形象勁跌嘅朴有天為咗挽回粉絲嘅心，所以先死口唔再認有拖拍。

更多韓流，喺晒《娛果》
http://fb.com/appledailyent