有自信心嘅女人係最靚。

52歲「美魔女」陳雅倫完全達標，佢雖然愛情交白卷，但事業卻填補佢嘅空虛，人生好充實。陳雅倫近日為美容院做代言，大騷34、26同36嘅fit爆身型，佢換上不同造型，有惹火拋胸；有高貴晒腿；也有性感露背。

對於自己身形，陳雅倫信心十足，佢今日接受《蘋果》電話訪問時話：「我最滿意條腰啦，出道時拍戲成日有着泳衣，個個都讚我條腰靚，係鉸剪腰呀，好靚、修身同有弧度，我都好自豪，係天生，我媽咪都係咁。」

除咗身形得天獨厚，其實陳雅倫後天都注重運動同飲食保養，佢分享貼士：「好多女仔成日話要減肥，其實做適當運動都OK，唔使好劇烈，我好多時係行吓跑步機，睇電視時原地踏步，郁吓手腳，伸吓腰同手腳，當然仲會推吓淋巴同經絡。飲食上，我堅持食得清，少油同唔食紅肉、零食，我冇食紅肉20幾年，聞到陣味都頂唔順，當年因為有個auntie離開，我為佢積福戒食，唔食就到依家。我又好鍾意飲玫瑰花茶，佢對女人精神、情緒好大幫助。」

陳雅倫幕前演出雖不多，她主力北上賺人仔，輕鬆做商演同登台，佢覺得女人有事業，有寄托，同時就會有心機去扮靚，時刻保持最佳狀態。問到陳雅倫還期待下一次戀愛嗎？佢坦言：「我冇諗過任關於拍拖嘅嘢，順其自然，冇得勉強，目前專心做嘢，把握目前握每個機會。」　

精選娛聞，喺晒《娛果》
http://fb.com/appledailyent