現年27歲嘅蔣家旻，做完《愛．回家》馬子妮之後，早前就「執二攤」接咗何雁詩因病辭演嘅《誇世代》，仲要同劉丹拍《馬家開飯》。雖然工作咁忙，但蔣家旻都好識偷閒，噚日被讀者影到同被指拍拖近5個月新歡Nic拍拖。

讀者林先生透過《蘋果》「爆相爆片」，話噚日下午4點幾，見到蔣家旻去咗將軍澳新都城商場搞嘅市集行街，其中有4、5個攤檔係由日本人開賣飾物，林先生話見到蔣家旻喺檔前試頭巾試咗好耐，又托高太陽眼鏡照鏡，全程都有個男仔陪伴身邊，佢話：「見佢都揀咗大約半個鐘，不停試，又問吓個男仔好唔好睇，但可能揀得太耐，個男仔有行後一陣玩手機，但好快又去蔣家旻隔籬，見佢最後都有買，但就唔知邊個畀錢。」買完之後，佢哋就一齊行去港鐵站離開。

馬子妮自從去年與前港台DJ，現在喺網台《轉身射個三分波》節目主持Martin分手後，年初就秘密換咗新男友Nic。據了解，Nic係結婚統籌公司老闆，年約30歲，Nic同蔣家旻喺一次聚會中認識，雖然個子唔高大，但勝在對蔣家旻一見傾心，發力狂追做咗三個月兵，先獲得女神確定男友身份。

蔣家旻噚日接受傳媒訪問時被問係咪拍拖？佢話：「有了解中嘅朋友。(咁Nic係咪你男友？)朋友啫，呢個世界唔係男就係女㗎啦。」蔣家旻透露同行仲有一位女性朋友，幫忙整理頭巾，佢話：「我哋都好鍾意日本嘢，我同朋友都識少少日文，咁佢日文叻啲，咪去畀意見。」