大台之前晒馬，揾齊旗下藝人幫嗰個號稱係市場未有嘅新App宣傳，但其實呢個App只係將本來嘅網上電視平台，加入咗類似Instagram同facebook呢啲現有嘅元素。

大台門面說法係粉絲可以透過呢個App同偶像互動，又可以睇到佢地做live節目或者藝人嘅動向，但講到尾都係為咗廣告收入啦，事關依家藝人賺廣告錢，同以前嘅模式已經好唔同，客戶慣常叫藝人將品牌產品放上網，無代言人身份包袱，而大台就睇中呢夠肥豬肉，希望分一杯羮，亦即係話大台嘅藝人，第日係咪仲可以自由喺其他社交平台，定一定要喺官方App發佈就唔知喇！

不過，大台不計成本去捧呢個App係事實，最近仲向ViuTV埋手，啱啱就高薪撬走咗做咗講性嘅節目《啪啪聲太好聽》監製鄭寶榮，而本來主持節目嘅梁梓禧（Roland）同鄧洢玲（阿旦）都無得留低，今日Roland就喺facebook貼相，話噚日已經錄完最後一集。

據知ViuTV因為監製要離開，節目都會變陣，有傳會揾卓韻芝、彭浩翔同100毛嘅Dickson開新節目。而被迫失業嘅Roland，今日接受《蘋果》訪問，佢話：「3個禮拜前知，因為原創監製升grade去大台做監製，佢離開，節目都完喇！（又失業？）睬，唔好咁難聽，完咗一個project又會有另一個揾你啦，做Artist係被動，相信其他channel有其他嘢啱會揾我啦！」

至於阿旦就話：「節目暫告一段落，但自己都唔會失業，因為有開按摩店，嚟緊會出書，又會接戲。」佢又話節目雖然完咗，但口碑好都開心，做咗一年自己都學咗好多嘢。