湯怡、陳茵媺同導演劉偉恒今日喺中環為新片《某日某月》進行謝票。

湯怡指《某日某月》口碑好好，比預期中好，所以要好努力跑謝票場，佢話：「上個禮拜有場謝票場，臨走時，我想喊，始終係自己第一次做女主角，對好多嘢都好擔心，好大壓力，睇返啲評論，大家都覺得我做到戲中嘅角色，因為我好怕自己返唔到15、6歲嘅時候，就連陳家樂都睇到眼紅紅，佢話諗起當年嘅初戀女友要移民，同劇情有啲似，我有啲唔好意思搞喊佢。」呢個初戀女友令陳家樂好傷？湯怡即刻話：「死喇，爆咗佢啲情史。」

至於陳茵媺早前同老公陳豪已睇過呢部戲，問到陳豪有咩意見？佢話：「佢讚我嗰場喊戲，我都滿意呢場戲，其他就有進步空間，希望仲有拍戲機會。」可唔可以夫妻檔？陳茵媺表示：「我覺得觀眾唔鍾意睇，佢哋鍾意睇啲幻想嘅嘢，如果我哋拍，就好似真人騷。」可以同另一個男演員拍親熱戲？佢直言：「所有嘢都要睇劇本，（妓女角色呢？）都係睇劇本。」有冇睇過陳豪嘅舊作，同女演員親熱都好激㗎喎？佢笑住話：「佢可以拍，但我唔睇，始終我係佢太太，我見佢錫其他演員，我會唔舒服，但作為演員，我會尊重佢嘅事業空間。」

精選娛聞，喺晒《娛果》
http://fb.com/appledailyent