【紅館謝幕】關智斌自言未夠火喉 感激好友仗義救場
蘋果日報 2019/09/15 10:58
古巨基關智斌容祖兒
關智斌（Kenny）一連兩場《KENNY is BORN 關智斌演唱會》昨晚尾場圓滿結束，繼續由古巨基、容祖兒、Twins、張敬軒任嘉賓，並大講有味笑話。昨晚吸引鄧月萍、余安安、康華、霍汶希（Mani）、鄭融、JW和男友、AGA、泳兒、 衛詩雅、陳家樂、鍾舒漫等捧場。
古巨基任嘉賓合唱快歌，Kenny一身純白露腰腹和股骨褲的裝扮繼續成焦點，完美演繹出Kenny肌肉線條，古巨基即叫Kenny360轉身曬股追月。之後古巨基指和Kenny不同年代但為何咁錫他，古巨基說：「因為佢靚仔，有次工作見到佢有禮貌，就逗吓斌斌啦，佢對住我笑，呢個笑容我用相片留起到而家，佢叫我做乜都做。」然後螢光幕展示一張Kenny張開口傻呼呼表情相片，古巨基說：「呢張相Mani都未識你，Y2K時候，你試下做返呢個表情，撐起隻大板牙，呢個就係小斌斌成長褪變 。」
之後到Twins上台時，Kenny已事先張揚叫嬌姐最好玩神秘做拉鏈嘴，阿嬌即反投訴，Kenny說：「你啲神經刀隨時狠狠地殺死人！」Twins又爆在後台偷睇Kenny換衫，阿Sa說：「我阿媽噚晚睇完你演唱會，你知啦上咗年紀女士見到男士喺台上除衫好High！我阿媽仲話一路以為我同Kenny會一對，我話吓？家長真係好多幻想，阿媽話你知啦，我哋去旅行成日同一間房，實情係我哋孤寒迫住同一間房。」
阿Sa爆Kenny因開騷節食體力不足，隨即表示有東西要送給他，阿嬌就遞上一條有斑點香蕉：「我叫阿蕉，我送我自己畀你。」阿Sa接住玩嘢送上火龍果，並笑他好耐冇食過，因火龍果是Kenny密友張敬軒的別名，還叫Kenny立刻在台上品嚐，可以成為第一位男歌星在台上吃火龍果，之後會幫他報健力士紀錄，Kenny笑指會滑腸，最後還是叫大家保持神秘，示意不要再講。
隨後容祖兒上台，Kenny赤裸上身演出後，祖兒勁摸Kenny的胸肌，笑指：「點解今日大咗咁多？」Kenny取笑祖兒：「你係咪好dry？一嚟就摸。」祖兒即反問：「你好唔dry咩？」。之後展開大黃色笑話，兩人不慎撞咪，Kenny緊張咪貴，祖兒即笑話：「枝咪係張敬軒，兩枝棍一齊撞吓撞吓，我講咪咋。」Kenny即說：「我個演唱會好健康，係你同Twins嚟到就咁。」之後Kenny示意想着衫怕攝親，但歌迷大叫：「着衫除褲。」祖兒即抵死說：「着衫除褲？試吓，你哋以為去咗泰國呀？」
張敬軒彈鋼琴和Kenny合唱，之後Kenny哀求軒仔：「黃色笑話唔好再講，老闆唔係好鍾意。」觀眾對二人同台反應特別激烈，大家都站立起來，並不斷嗌：「咀佢！」之後軒仔主動和Kenny深情擁抱，觀眾並不收貨繼續狂叫「咀佢！」軒仔無奈回應「咩玩法？」之後回顧兩人相識十七年，指Kenny保養好，Kenny即叫軒仔可以多做面膜，軒仔忍不住反指：「噚晚完騷後好多人留言話我靚仔過你，說明冤豬頭都有盟鼻菩薩。」兩人在台上表現有另類火花，一起回顧相識和經歷，軒仔看到如今的Kenny，十分感觸。然後深情演繹一首愛的歌曲，唱出《只是太愛你》。
演唱會尾聲時Kenny走到台邊和觀眾握手，他說：「我諗我係第一個歌手喺紅館握手握到喊，見返好多熟悉面孔，好多回憶，會好好珍惜。」期後Kenny在致謝環節中公開多謝軒仔，在演唱會給予很多不同意見，自認多瑕疵和沙石。唱到紅館法定時間仍未完騷，kenny說：「過了十一點半，係唔係都要罰錢，對唔住老闆，大家一齊多謝老闆啦，你估唔使我到扣？」
接住嘉賓祖兒、阿Sa、古巨基、軒仔一同上台搞氣氛，Kenny跪地多謝大家，卻換來被祖兒阿Sa夾攻，祖兒說：「 咁開心又咁多謝我哋，逐個錫一啖囉。」阿Sa補充：「做咩啫，多謝我哋之嘛。」Kenny首先親親古巨基臉頰，然後祖兒和阿Sa左右輪住咀，到軒仔時大家已驚呼狂叫，最終軒仔做了個抹咀動作，迅速地錫了Kenny面珠一啖，後即彈開，最後一齊再encorn唱出《眼紅館》，至2350才告完場。
整晚被幾位好友輪住玩，亦達成觀眾一吻心願，Kenny 騷後受訪時表示沒有尷尬：「成日同祖兒、基仔佢哋都係咁咀。」Mani在旁解釋大家一家人關係齊齊撐場和私人感情冇關，而台上情節是編排一部份，但Kenny全不知情。追問Kenny和軒仔是否感情復合？他說：「家人感情，咩感情復合，見面錫吓。」是否十分驚喜？Kenny說：「冇，只係平時唔喺台上錫，大家大驚小怪。」至於每當Kenny和軒仔同台時觀眾全場哄動，似有所暗示？Kenny表示諗唔到。
舊拍檔Steven因感情事形象插水退出演唱會，Kenny曾邀請對方來欣賞，並說：「佢冇嚟到，都知佢心情，佢曾經都係我哋屋企人，佢未面對到，同佢講take time，畀時間佢自己好好做好自己角色，隨時歡迎佢返嚟玩。」
Kenny今次在六星期內超班完成演唱會，足足瘦了一個碼，感謝嘉賓撐場旁實，謙虛表示：「知我自己仲未夠火喉，四位救咗我好多，完騷後要好好請佢哋食飯，一萬元一位都要請，天王巨星一晚歌酬都唔止啦，仲要中秋檔期喎，好多人情債要還。」
攝影：林賓尼
巨基任嘉賓合唱快歌，Kenny一身純白露腰腹和股骨褲的裝扮繼續成焦點。
古巨基帶來了一張老相片：「呢張相Mani都未識你，Y2K時候。」
Twins大爆在後台偷睇Kenny換衫。
阿Sa說：「我阿媽仲話一路以為我同Kenny會一對，我話吓？」
Kenny今次在六星期內超班完成演唱會，足足瘦了一個碼。
容祖兒上台大講有味笑話。
每當Kenny和軒仔同台時觀眾全場哄動。
兩人在台上表現有另類火花。
舊拍檔Steven因感情事形象插水退出演唱會，Kenny表示曾邀請對方來欣賞。
Kenny謙虛表示：「知我自己仲未夠火候 ，四位救咗我好多。」