醫管局成立25年，經歷3次大工潮。巧合地由2000年開始，每7年一爆。頭兩次，公共醫療醫生協會前主席佘達明都身處風眼，第3次，在伊利沙伯醫院工作了19年的他，終於隔岸觀火，「07年工潮，翌年我就走，同醫管局交過手，就知個制度唔變，歷史只會不斷重演」。由抗議同工不同酬到爭取跟隨公務員加薪3%，重回公院，百感交集：「咁多年，工潮陰魂從未消散。」收火的麻辣醫生說。
白衣怒潮來得快去得快，醫管局通過動用兩億儲備撲火，看似解決，聲援的老鬼佘達明卻說未必，「醫管局成立，就為咗控制開支，咁多次轉制，唔同階段入職醫生，一直同工不同酬」。

嘆老人科不受重視

2000年會長黎鏡堯是公務員、今屆會長陳沛然新制聘任，1989年中大畢業的他，則是首批由公務員轉職醫管局的公院醫生。「我1992年轉制，如冇走，就係直接受影響嗰批高級醫生」。曾幾何時，佘說以醫院為家，以為做足一世。
「私人市場需求大，逃亡潮一直存在，但我唔係張宇人口中嘅星球醫生（一星期搵一百萬），揀得老人專科，係希望服務基層市民。」伊院成長，2000及2007年的工潮都積極參與，「伊院醫生最多，動員能力最高，向來係工運搖籃，靜坐嗰日好似老鬼敍舊」。今次加薪，影響的大多是資深醫生，但群情洶湧，只因深知「老鬼走埋，新醫生更無議價能力」。
「HA（醫管局）系統好成功，用最少資源，解決大部份市民醫療需要，成績表亮麗，但制度成功，不代表個人成功。」一將功成萬骨枯，佘謂公院工作量超負荷已是常態，但現實上，龐大系統山頭處處，除肝臟移植及癌症等重點科目，其他科目資源一直緊絀，「我走嗰時已係老人科嘅主管，無力感好大，老人專科喺體系上係最立雜嘅專科，生癌入腫瘤科、有心臟病去心臟科，乜都唔係但周身病痛，甚至需長期卧床嘅就嚟」。
公院這類長者有個不好聽的名字，叫垃圾病人，像人球般被踢來踢去，「走出嚟，起碼多啲時間睇症。我有部份病人公私營兩邊走，喺公立醫院覆完診，再攞啲藥過嚟睇我。公私營合作講咗咁多年，實行唔到，惟有民間自己做。」但能找上他「合療」的，大概只是能者自付的老人吧？麻辣醫生一陣沉默：「我24歲做醫生，假設做到60，職業生涯有36年，其中19年服務基層，都想留啲時間畀自己。」他苦笑。
■記者呂麗嬋