好幾年前，當孫柏文同戰友幸運地抽到馬匹入口證之後，有日同老竇坐喺屋企吹水。我作為一位初哥，就算多年來跟住老竇，但養馬呢回事仍問題多多。我一路問，老竇就一路答，仲不時勸告話佢講故我唔好駁故。
當我問到七七八八，客廳只聽到電視新聞台細細聲，同埋老竇剪手指甲聲。兩人冇發聲片刻，佢一路望住啲指甲，忽然好嚴肅咁話：「仔，唔好學啲好naive嘅人咁，覺得養嘅馬可以做馬王。知唔知？」我眼望住電視，諗一諗答：「老竇，其實我只得一個期望，就係隻馬唔好輸畀隻零分馬。」
佢一聽即展露燦爛笑容，原因呢個期望好謙卑，開心個仔思想成熟，又或者老竇90年代初養第一匹馬時，頭兩季冇贏過，到第三季落到當時仲有嘅六班，俾一隻零分馬贏咗佢嗰隻，好開心個仔仲記得呢個事蹟，所以笑。
點知，跑馬就係咁邪。點解我咁講？原因我匹「樂家將」上仗又輸到冇雷公咁遠，一跑完都知會減分減到落五班。即係話未來有機會同零分馬競賽，即理論上真係有機會輸畀零分馬！如果真係咁，我已可想像老竇既嚴肅又認屎認屁，用Itoldyouso嘅語氣話：「叫咗你唔好咁naive！」
冇錯，原來養馬呢回事，不論你放幾多心機、時間、金錢，就連「唔好輸畀零分馬」都唔好期望。要心如止水，否則滿腦失望。今期自己匹「樂家將」出賽，跟慣例冇推介。